حومة البلوغسفير... أحد الاحياء الشعبية الكائنة بإحدى المدن التونسية


البوبلينات، الخمسة متاع العشية... ما ثمة حتى حد، كان صفوان قاعد ع البيرو متاعو، اقد، و ماهوش جايب خبرة للتنطين متاع المسنجر

يدخل نوسترا، مولى البوبلينات... يلقى صفوان راقد، يبتسم و يدوّح راسو

نوسترا: (يعيط) لا تبارك الله عليك سي الشباب... محل خدمة راهو

صفوان: (يفيق م النوم، مش عارف روحو وين... يتلفت يمين و يسار، مش فاهم حتى شي) ...

نوسترا: مش مليح ترقد في محل خدمة، حتى البركة ما تهبطش

صفوان: و الله ماني عارف كيفاش خذاتني عيني

نوسترا: باهي باهي، هاو بش نعديها المرة هذي... أما رد بالك تتعاود

صفوان: لا لا، ش من تتعاود... تو هذا كلام

يقوم صفوان من بلاصتو، يعمل روحو يتفقد في الاورديناتورات المرشقين في المحل... و يقعد نوسترا ع البيرو

نوسترا: تراه ايجى حللي هاك اللي نكتبوا بيه

يمشي صفوان يحللو الوورد

نوسترا: نحبو يكتب بالعربي

صفوان: (بعد ما يعمل نزلتين بالسوري) باهي، اهوكة بالعربي

نوسترا: باهي... برّه على روحك

قعد صفوان على بوست بعيد، بش عرفو ما يشوفوش، حل المسنجر و رجع يشاتي على روحو... و قعد نوسترا يثبت في الكلافيي و ساعة ساعة ينزل على فلسة

نوسترا: كيفاش تتعمل الشدة

صفوان: (يقوم من بلاصتو بش يمشي لعرفو نوسترا يورّيه كيفاش) هاو جيتك

نوسترا: وين جاي، شد بلاصتك... قوللي علاها كيفاش تو نعملها وحدي

صفوان: (بعدما يعاود يقعد في بلاصتو) انزل ع الشيفت، و حرف الــ ذ... اللي فيه نجمة

نوسترا: امممممم... باهي، صحيت

نوسترا: (يقعد يتفرّج في الايكرون متاع الاورديناتور و يمهمه وحدو) هي حتى بلا شدّة مفهومة

نوسترا: (بعد بربع ساعة) تراه لوّجلي على تصويرة متاع نوارة حمرة... موش متاع المرة اللي فاتت

صفوان: (يقعد يبربش شوية ع الأورديناتور اللي قاعد قدامو) نبعثهالك كيف المرة اللي فاتت

نوسترا: أي، حطها فين حطيتها المرة اللي فاتت

و رجع نوسترا درى فاش يعمل ع الأورديناتور... لين كيف كمّل، طبع ورقة

صفوان: سايي واضحة...

نوسترا: أي أي... امورها في العنبر

نوسترا: (يسكت شوية) هيا انا خ نمشي تو... كان هكة زيد نصف ساعة اخرى و سكر انتي زاده كان ما جاش حتى حد

صفوان: باهي عرفي

يخرج نوسترا م البوبلينات، يقوم صفوان يجري في جرتو يتفقدو إذا كان بعد و إلا لا... منها يرجع يقعد ع البيرو، يبربش و عينيه مرشوقة في الايكرون متاع الاورديناتور

صفوان: (يبتسم، إبتسامة النصر... متاع واحد لقى اللي يلوج عليه) تحيّاتي، و وردة حمراء زاده... يا عيني على عرفي كيف يعبر

صفوان: (يسكت شوية) ملا نوسترا... درى علاش ناوي


التاكسيفون... تدخل أرابيكا، بابتسامتها المعهودة تسلّم على كيبيتز، ترميلو هاك الكمشة صرف ع الكونتوار

أرابيكا: كيبيتز، أمونك... تصححلي الدينار هذي

كيبيتز: (بالإبتسامة المعهودة متاعو) بالطبيعة!

يرمي الفلوس في القجر، من غير ما يحسبهم، و يمدّلها الدينار... تاخذو ارابيكا و تدخل تجري للكابينة، و كيبيتز يتبّع فيها بعينيه

درجين، و تعاود تخرج أرابيكا م الكابينة... خارجة م التاكسيفون، تتلفت لكيبيتز تلقاه قاعد وراء الكرسي و عينيه مغمضين

أرابيكا: شاهية طيبة خويا

كيبيتز: (يفيق مفجوع) و انتي بالأمثل، يعيشك

تخرج أرابيكا م التاكسيفون، ماشية للكشك متاع شهاب، تعجّل في المشية متاعها على خاطرو شهاب قاعد يلم في الدبش و يحضّر في روحو بش يسكّر الحانوت

متعدّية وسط الحومة، تلقى بالملوان و فري راس و كلاندو و بيغ تراب و صفوان قاعدين تحت الشجرة

أرابيكا: (باقي تزرب، من غير ما توقف) أهلا بأولاد حومتي... انستو

بيغ تراب: اهلا بيك أرابيكا... شنوة احوالك

ما يتلقاش إجابة، لأنها ارابيكا وقتها بعدت، و السلام متاعها كان فقط تطيير ملام بش ما يقولوش شبيها طفاتهم

كلاندو: (يتلفت لبيغ تراب) اتهنى، ديمة هكاكه... مزروبة و ما تاقف لحد و ما تحب تحكي مع حتى حد

بالملوان: لا لا، تلقاها مزروبة و عندها ما تقضي

كلاندو: (مش عاجبتو الهدرة) طول عمرها مزروبة

فري راس: و انتي ش حرق شعيرك، هي ع الأقل كي تعدّات رمات علينا السلام، ش تحب منها اكثر من هكه

كلاندو: لا نحب و لا نكره، تدبّر راسها

يقعدوا ساكتين، يتبعوا في أرابيكا كيفاش حكات شوية مع شهاب، و دخلت معاه للحانوت، و خرجت في يدها قرطاس كاغط... و قعدوا يتبعوا فيها و هي تشق في الكياس، ماشية لدار الشيخ ازواو، بش تعمل قعيدة مع بناتو قبل ما يذّن المغرب

صفوان: علاش ما تقعدش تعاون امها في تطييب العشاء

بيغ تراب: و آش يهمك فيها، بش تبات انتي بالشر كيف هي ما تطيبش العشاء

بالملوان: لا، هذيكه أرابيكا ما تحبش الخوضة متاع التطييب... اكسكيزا هي اللي تدور مع امها في الكوجينة

صفوان: آهــه، اكسكيزا... و انتي منين ليك الأخبار هذي الكل؟

بالملوان: (يحكي مع بيغ تراب، مع ابتسامة مصطنعة تحمل في طياتها نوع من العتاب و الغضب) ملاّ خو عندك... ياخي كيفاه عايشين معاه في الدار هذا؟

بيغ تراب: بالقدرة... هانا نسايسوا فيه و ناخذوا فيه على قد عقلو و أكهو

صفوان: (يكشّخ) علاه... ش ريتوني عامل!


دار الشيخ، بيت سنية... أستوسا و أرابيكا قاعدين على حافة الفرش متاع سنية يحكوا و يضحكوا... مريومة شاردة، سارحة، واقفة قدام الشباك متاع البيت، مبعدة الريدو بيدها شوية بش اتنجّم تتفرج في جماعة الحومة كيفاش ملمومين...

تدخل سنية، تتفاجأ أنها تلقى أرابيكا في البيت... تصيح فرد صيحة م الفرحة و تمشي تسلم علاها، بأربعة بوسات و تحضنها لين قريب تعصرها

سنية: كيف السبة، تي وين كنت المدة هذي الكل يا طفلة

أستوسا: كانت بحذى شهاب

سنية: (ما عجبهاش حديث استوسا) باهي، صحيتك...

سنية: (تجبد أرابيكا من ذراعها) ايجى نقوللك... عندي ما نحكيلك

يمشوا سنية و ارابيكا للكوجينة، مريومة باقي في نفس الوضعية و سارحة... استوسا تمشي توقف مع جنبها، و تثبّت في الجماعة اللي قاعدين

أستوسا: (تثبّت و يبان علاها أنها مركزة) ياخي تشوف فيه من هوني؟

مريومة: (تتنهد) لا! مانيش نشوف فيه

في الكوجينة... سنية و أرابيكا يتضاحكوا

أرابيكا: الحانوت معبّي بالتمر... مشيت بش نشري رطل دقلة، حلف انو ما ياخوش الفلوس... كيف شديت صحيح ولّى خذى حق الرطل و زادني رطل من عندو بلاش، قال هدية رمضان

سنية: (بكل لهغة) أكهو... هذاكه ش عندو جديد

أرابيكا: (تبتسم) لا، عندو زاده نعناع جديد، فاوح، يعمل ستة و ستين كيف

سنية: (تضربها على كتفها) أمــان، ريت روحك مـبلدك

أرابيكا: (تدهش بالضحك) شنوة تحبني نقوللك... هذاكه ش صار من وقت اللي دخلت للحانوت متاعو لين خرجت

سنية: و الله لا بقيتها نحكي معاك جملة امالا

أرابيكا: زعمة!

تدخل أستوسا للكوجينة...

أستوسا: تي شنوة الحكاية ياخي، ثمة اسرار ما نعرفهاش... بتذاكروا من ورانا و إلا إيــه؟

سنية: برّه برّه على روحك... ما لقيتك زعيمة كان في الحديث الفارغ

سنية: (تتلفت لآرابيكا) هاك بش تقعد تشق الفطر بحذانا اليوم

آرابيكا: لا لا... و الله ما انجمها، مامّا تعمل فيّ

أستوسا: آش من ماما و آش من بابا... و الله لو كان ما تقعدش اليوم تشق الفطر بحذانا

أستوسا: (تسكت شوية، ما تلقى ما تقول) ...

أرابيكا: أي... شنوة؟

أستوسا: (تدهش بالضحك) ما أركك... تي اقعد امان

أرابيكا: باهي باهي... نوصّل القضية لمامّا و نرجع

سنية: ترجع... اكيد

أرابيكا: باهيشي زاده... ماو قلتلك تو نرجع، معناها سايي، بش نرجع


يضرب المدفع، آذان المغرب...

دار الشيخ... أزواو قاعد في الصالة يحكي في التليفون مع ولدو عمروش

أزواو: أي أي، ربي يسهل

التليفون: ...

أزواو: انتي صايم و إلا لا؟

التليفون: ...

أزواو: امالا استكفى بروحك

التليفون: ...

أزواو: هيا عاد، المغرب اذّن عندنا تو... خليني نمشي ناكل فمّين

التليفون: ...

أزواو: دبّر عليّ زاده وقتاش نفطر و وقتاش نشرب... يعجبكشي تو

يعلّق التليفون و يقوم من بلاصتو ماشي للطاولة، بناتو الثلاثة سنية و مريومة و أستوسا و معاهم أرابيكا قاعدين يستناو

أزواو: شبيكم ما بديتوش؟

أستوسا: نستناو فيك بابّا

أزواو: أفطروا أفطروا... علاش تستناو فيّ، تعرفوني صايم

مريومة: ش يحب من عندك عمروش؟

أزواو: و انا منين نعرف عليه... صرفت عليه ملاين زرقاء بش بعثتو لغادي... تعلملي ركعتين و ولّيت أنا كافر قدّامو

أزواو: ربّي يهديه... ربي يهديه

أرابيكا: ربّي يهدي

أزواو: لا... و نقوللو راهو الطبيب محللي الفطار، يقوللي يكذب عليك

سنية: عدّيت عند سي كوادونوف؟

أزواو: أي كيف ما كل رمضان، و قاللي ملزوم عليك ما تفطر

مريومة: (تحكي بالشوية، بش بوها ما يسمعهاش) ماهو يعرفك راسك صحيح

أزواو: هيا اقعدوا شقوا فطركم انتوما، و افرحوا بأرابيكا

أرابيكا: يخليك عم أزواو و يباركلنا فيك... أقعد افطر معانا

أزواو: يعيّش بنتي... من غير ما نقوللك، الدار دارك

أزواو: انا خليني نمشي نشرب قهوتي بحذى عمكم حسين و نقصد ربّي للحانوتة نحلها على بكري

سنية: باهي بابّا... ما توصّي شي

أزواو: لا لا، ردّوا بالكم على ارواحكم و على صاحبتكم أرابيكا

يخرج ازواو م الدار، و يخلي الأربعة بنات شايخين بالضحك عليه كيفاش اتعاركوا هو و ولدو عمروش، كيف العادة في كل رمضان


دار قاسم، بيت النوم متاع الڤوفرنور... قميرة مرت الڤوفرنور تريڤل في الكرافات متاع راجلها و تعاون فيه بش يلبس الفيستة

الڤوفرنور: و الله ماني فاهمك... ياخي لازمة الكرافات في الغمة هذي!

قميرة: (مع الابتسامة المعتادة اللي عمرها ما تفارقها) أمانك... على خاطري، تعجبني كي تلقاك لابسها الكرافات

الڤوفرنور: (يدهش بالضحك) بالله، معناها من غير الكرافات ما نعجبش!

قميرة: (بكل دلال) تي لا... اما بالكرافات تلڤاك عاطي وهرة و هكه ذخامة (بإشارة بيديها و كتافها) درى كيفاش

قميرة: تي اخطانا م الكرافات بالله، ڤلتلي خالك فسيفساء كيفاش رمى روحو في الهفهوف

الڤوفرنور: أي نعم... بعد ما خمّجها و نتّنها مع العباد الكل، عدّى مدة و هور يهدد راني بش ننتحر، راني بش ننتحر... نستخايلوه كلام في الفارغ كيف ما قبل

قميرة: شنوة... صارة ديمة يهدد فيكم اللي هو بش ينتحر

الڤوفرنور: طول عمرو مشاكلي، يخرّج روحو من مشكلة بش يطب في واحدة اخرى... و كل مدة يوصللنا الخبر اللي هو انتحر، من بعد ما نلقاوه كان قدّامنا

قميرة: (تحس في بدنها يقشعر) يا اميمتي!

الڤوفرنور: خلقوا ربّي بسبعة أرواح اللطف... الله يرحمو ميت كان و إلا حي

قميرة: الله يرحمو، و يلطف بينا و بيه

قميرة: (تسكت شوية) أي و امك، ش عاملة

الڤوفرنور: ش بش تعمل بالله... أهوكة كل وين يقولولها مات، يلبسها جنّي اللهم عافينا و تولّي تهلوس مدة من بعد تريض

قميرة: (مرعوبة) اللهم عافينا

الڤوفرنور: (يبتسم) هيا ماعادش بكري عليّ عاد... خ نمشي

قميرة: (تعمل روحها تنفض في الغبرة من ع الاكتاف متاع راجلها.. فقط كدليل على العناية و الاهتمام) برّه عزيزي... في وديعة ربّي

قميرة: (خارجة هي و الڤوفرنور م البيت، شادتو من كتفو) ما تبطاش عاد


القهوة متاع الحومة... العباد الكل شادة بلايصها، نفس التشكيلات م اللي بدى رمضان، تتبدّل بعض ساعات كي تصير بعض المشاكل، لكن سرعان ما تصفى الاجواء و يعاودوا يتلمّوا م الأول و جديد...

كبارات الحومة قاعدين، واجمين... قصة اون لاين و براستوس حاطين يديهم على خدودهم

الناقد: هيا جاشي سي حسين عاد، خلينا نبداو الطرح متاع الشكبة

قصة أون لاين: و إلا حتى كيف يجي... بصراحة اللعبة موش اللي هي

الناقد: علاه زاده...

قصة اون لاين: سي حسين ما يقعد كان بعد ما يتهنى ع الخدمة اللي هي ماشية... وقتها تلقاها شطر الليلة تعدّات

براستوس: و زيد حتى كيف يقعد، ما يتلهاش باللعبة... تلقاه ليلة كاملة و هو هاو يغمز في فلان، هاو يبيبي لفلان، يقوم يمشي يسلّم على سي فلان... فدّة برجولية

قصة اون لاين: و الله عندك الحق، اللعبة هكة بلاش بيها خير

الناقد: تي نعرف، أنا بيدي ساعات تطيرلي م اللعبة، تلقاني نستنى فيه بش يغزرلي نغمزو و إلا حاجة، و هو ماهوش على هاك الوارد جملة... مرة يعيّط جيب ڤازوزة من عندي لولد سي فلان، مرة يوصّي ع الولعة متاع الشيشة متاع سي فلان

الناقد: أما ش بش نعملولوا بالله، ماهو يخدم على روحو

قصة اون لاين: يخدم على روحو، ربي يعينوا ما قلنا شي... أما احنا زادة نحبوا نتفرهدوا و نعملوا جو

براستوس: اش مازال بالله، تو نهارين و يروح سي سمسوم و تو نشكبوا لين نفدّوا

الناقد: و الله عندك الحق... ربي يوصلوا سالم

مازالوا قاعدين هكاكه، و يسمعوا في العيطة و القهوة كيف شاشت... ما نجموش يفهموا الحكاية شنوة بالضبط، لكن واضح انها حاجة باهية

بالصدفة منتصر القهواجي متعدّي مع جنبهم، يشدّو الناقد من كتفو و يوقفو

الناقد: ش ثمة... إن شاء الله خير؟

منتصر: (بنبرة تدل ع الفرحة متاعو) العروس... جاء

قصة اون لاين: (يهمز براستوس) برّه اجري أخطفو و جيبو خليه يشكّب معانا الليلة

الناقد: (بنفس الحماس) فيسع، ازرب روحك قبل ما يجي سي حسين و يشد بلاصتو

عند المدخل متاع القهوة، الڤوفرنور واقف و الشبيبة متاع الحومة الكل دايرة بيه، تبوس و تعنّق و تبارك و تهلل... براستوس يزاحم في العباد لين يوصل للڤوفرنور يشدّو من كتفو و يجبدو

بيغ تراب: تي شنوة تو بابا... ما صدقنا شفناه الراجل بش تهزو ديركت

كلاندو: تي خلينا نفرحوا بيه الساعة شوية، و نعملوا الواجب...

كلاندو: (يسكت شوية) ياخي ماكش تشوف فيه الراجل خانق روحو في كرافات و فيستة اللي يقوللك، خلي ع الاقل يخدموا خدمتهم

منتصر: الواجب اتعمل سايي، عرفي قاللكم مشروب الليلة الكلو خالص على حساب القهوة، طلة الڤوفرنور عزيزة و غالية

و صاحت العباد الكل فرد صيحة فرحانة بالخبر...

الڤوفرنور: (يحكي مع حسين) تعيش عم حسين، نردّوهالك في فرح إن شاء الله

حسين: إن شاء الله ولدي... يخليك

مازالوا هكاكه و يصيح البوهالي، اللي شادد الكاسة وراء الكونتوار متاع القهوة

البوهالي: راهو كان المشروب خالص... الكارطة و الشيش موش داخلين في الخلاص

يتلفت براستوس للڤوفرنور، و يجبدو من يدّو

براستوس: هيا إيجى ولدي، عندنا ما نحكيو معاك

البرباش: تي خليه يزيد يقعد شوية، الراجل م العرس ما رينالوش وجهو

بالملوان: أي و الله، آخر عهدي بيه و احنا نشطحوا في العرس

كلاندو: و شبيك شادد صحيح فيه، آش بش تحكيلو بالله

براستوس: امور متاع رجال... ما تفهموش فيها

كلاندو: علاه عم براستوس، ماناش رجال قدامك

براستوس: (مزروب) كيف تعرس، تو نجبدك على جنب و نفهمك الهدرة شنوة

صفوان: يجي نهار و نعرسو... برّه مايسالش

بيغ تراب: (يضرب خوه على كتفو، في نفس الوقت اللي يڤحرلو على فرد جنب) مزروب... لين نعرّس انا قبل... الكبير بالكبير

الڤوفرنور شادد الجرة وراء براستوس اللي شادّو من يدّو، وسط الزحمة اللي بدات تقل على خاطر معظم العباد رجعت شدت بلايصها، لين يوصلوا للطاولة وين قاعدين الكبارات متاع الحومة

براستوس: (يحكي مع الڤوفرنور) هيا شد بلاصتك

قصة اون لاين: أهلا بولدي، شنوة احوالك و ش عامل

الڤوفرنور: الحمدولله، شنوة احوالكم انتوما

الناقد: لاباس لاباس... ما دام انتي جيت أحنا بحول الله لاباس

الڤوفرنور: (يتلفت لبراستوس) هيا، كيفاش تو... شنوة الحكاية؟

براستوس: (باهت، ماهو فاهم حتى شي) أما حكاية... فاش تحكي؟

الڤوفرنور: (حتى هو باهت و ما عاد فاهم شي) نسمع فيك تحكي للجماعة قلتلهم حكاية متاع رجال، معرسين...

براستوس: (يضحك، يشيخ بالضحك) جدت عليك صارة انتي الحكاية

الناقد: لا حكاية و لا رواية ولدي... استاحشناك و حبينا نحوزوك نلعبوا معاك طرح شكبة

قصة اون لاين: هذيكة هي الهدرة

الڤوفرنور: (تعجبو الهدرة هو زادىة) صاره... ماهو قول م الاول

براستوس: تي وين كنت غاطس المدة هذي الكل

الڤوفرنرو: (يبتسم) هيا هات، هات الكارطة... أنا نمشكي

قصة اون لاين: (يفرك في يديه كيف اللي يستنى في جايزة) كيف ما تحب، ناخذو بخاطرك على خاطرك مازلت عروس جديد

الناقد: (يعيّط) يا سي حسين، من غير ما تجي الليلة، دبرنا كرع رابع

حسين: (يعيّط هو زاده م الكونتوار) تي لا عاد... لحظة هاو جيتكم

الناقد: لا لا، الڤوفرنور حلف انو ملزوم ما يشكب معانا الليلة، و الراجل عروس خلي ناخذولو بخاطرو بالله

الڤوفرنور: (باهت في عجب ربّي) انا حلفت؟

براستوس: (يهمز الڤوفرنور) تي أسكت... حتى لو كان جاء، قول شاهيها اللعبة عندك مدة

حسين: باهي، على خاطر العروس، كلو يهون

الڤوفرنور يدهش بالضحك و في نفس الوقت يبدى يفرّق في الكارطة


تعليق kmaira

صباح الخير
اليوما عندك غلطة في السيناريو
شادة goal
:)))



تعليق DJ WAEL

يظهرلي ما يوفي المسلسل كان ما الجماعة الكل يعرسوا هههه



تعليق Astussa

sbeh elkhir barbech, ya3tik essaha fil mousalssel mwanasni barcha ken tchouf nebda na9ra et nadhek wahdi, surtout wahed ki yabda ya3ref les personnages en vrai loool
aya la suite, j'ai hate :O)



تعليق mariouma
أزال المؤلف هذا التعليق.


تعليق mariouma

3ala echbouk netnahed zeda????
enhar mabrouk :)



تعليق shadow

wééé mariouma enti zada hawak 7alték mén 7élét les zamoureux je serais curieuse de savoir chkounou éli mali 3énék lol!
tab3an el2a7dath elmoussalssalia la 3ala9a laha belwa9a3 ya jma3a temchiwéch tanssaw mdr!



تعليق brastos

ههههه
يا برباش .. والله شهّيتني في طريّح كارطه من هالنوع ...