حومة البلوغسفير... أحد الاحياء الشعبية الكائنة بإحدى المدن التونسية يضرب المدفع، آذان المغرب... دار العدول، الجماعة الكل ملمومين، العدول حاطط فدفود ولد طارق على حجرو، و مع جنبو مرتو ولاّدة، طارق مع جنبو مرتو بسيناج، مقابلينو مروان و مع جنبو خطيبتو اكسكيزا بنت الناقد، كلاندو و فري راس مقابلتهم دحدوحة قصة أون لاين: ايـــه، إن شاء الله ديمة ملمومين هكة، بسيناج: هات نشد عليك فدفود يا حاج، تو يقلقك و ما يخليكش تشق فطرك مرتاح قصة أون لاين: (بنبرة كلها دهشة مرحة) فدفود يقلقني... يزيك بلا كلام يعيش بنتي قصة أون لاين: (يبوس فدفود، يسكت شوية قبل ما يكمّل) ناقصنا كان خوكم وليد و تكمل الفرحة طارق: (ما يقيمش وجهو م الصحفة متاع الشربة) كلمتو البارح قبل ما نركب في الطيّارة و قال بش يحاول يروّح في العيد، الخدمة كابسة ياسر المدة هذي و زيد القراية واخذتلو وقتو الكل ولاّدة: ربي يعينو كلاندو: صحة عليه... حرق الفيزا و نجم يريڤل وراقيه و زيد يعاود يرجع يكمل قرايتو بسيناج: (تتلفت لطارق راجلها على فرد جنب) نجم يريڤل وراقيه... صحة عليه طارق: (يڤحرلها على فرد جنب، و بإشارة خفيفة بوجهو يطلب منها انها تسكت) ربي يسهللو بسيناج: (تبتسم، تتلفت لاكسكيزا و بالملوان اللي قاعدين مقابلينها) أيواه... ما اتلهيتش بيكم انتوما الزويز، من قبولي و أحنا خايضين في الكوجينة ما لقيناش وقت بش نحكيو اكسكيزا: (وجهها يحمار و تبطّل الماكلة م الحشمة) ... بالملوان: (يحاول يغطّي على حالة الخجل اللي انتابت خطيبتو اكسكيزا) تي شنوة بسيناج... شبيك؟ بسيناج: انا ما بيّ حتى شي... طلعت ماني فايقة بحتى شي بسيناج: (تعاود تبتسك، تسكت شوية قبل ما تكمّل) من وقتاش اكسكيزا: (تغمزها، مع الإبتسامة المعهودة متاعها) من بكري... غير انتي ما جبتلناش خبرة بسيناج: (تدهش بالضحك) شوف يا سيدي... هذي العاقلة ولاّدة: ما تقلّقش روحك يا بسيناج... هذوكة سرهم بيناتهم ما يقولوه لحد ولاّدة: (تسكت شوية) تي هو أحنا، اللي عايشين معاهم، ما في بالناش... بش انتي تكون في علمك قصة اون لاين: (يحاول يبدّل الهدرة، لانو يحس انها اكسكيزا بنت سي الناقد صاحبو دخلت بعضها و ماعادش لاقية راحتها في الماكلة) و فدفود... وقتاش بش تطهرولو بسيناج: ووه يا حاج، مازال صغير قصة اون لاين: لا صغير لا حتى شي، مصلّي ع النبي عليه راجل... و إلا ناوين بش تخليوه هكاكة كيف ما يعملوا الامريكان غادي بسيناج: (تسكت، و تحاول تكتم ضحكتها) ... طارق: لا لا... أما قلنا مازال صغير، خلي عام و إلا عامين اخرين قصة اون لاين: لا عام لا عامين... ما تروحوا بيه كان مطهّر المرة هذي بسيناج: ووووه قصة أون لاين: (يقص عليها ما يخليهاش اتكمّل) ما تخلّينيش نحلف... قلت يطهّر رمضان السنا معناها يطهذر رمضان السنا... يوفي الحديث بسيناج تتلفت لراجلها طارق، اللي بدورو يغزرلها و بإشارة بحواجبو مصحةبة بابتسامة خفيفة، تفهم أنو زايد الحديث... فدفود بش يطهر رمضان السنا العشرة و نصف متاع الليل، دار قاسم الهارب، الجماعة الكل ملمومين في الصالة، يتفرجوا في التلفزة كاكتوسا: (تحكي مع خوها الڤوفرنور) كيف سبتك قاعد معانا في الدار... موش عوايدك الڤوفرنور: علاه، شنوة عوايدي بالله يا للا، تراه قوللي كاكتوسا: مستانس شطر عشاك تكملوا في القهوة مع جماعة الحومة الڤوفرنور: أي، و العرس اللي عييت و انتي تلوي في حزامك فيه انتي و سي البيغ تراب... الڤوفرنور: (يسكت شوية، يدس مرتو قميرة اللي قاعدة مع جنبو) و قميرة هذي اللي قاعدة مع جنبي... جاتك شوية بش ما نتبدّلش على خاطرها قميرة: (يعجبها كلام الڤوفرنور، و تزيد تلصقلو و تحط راسها على كتفو) يخليك يا عزيزي الڤوفرنور: (يتلفّت لأمّو) يومّا... شنوة حكاية خالي موزاييك، ثمة خبر عليه و إلا لا أنفينيتي: (بنفس النبرة متاع الدهشة، اللي ملازمتها المدة الأخيرة) آه... موزاييك، خالك الڤوفرنور: أي أي، خالي... ياخي ناوي بش يعمللنا كيف ما هاك العام أنفينيتي: الله يرحمو الڤوفرنور: الله يرحمو، ميت كان و إلا حي قميرة: (تكبّش في يد راجلها) ش ثمة زاده الڤوفرنور: (يحاول يطمنها) لا لا، حتى شي... أما ثمة شكون قال شافوا في زنقة الحمام متاع حومة السوق كاكتوسا: (بكل دهشة) الحمّام كاكتوسا: (تسكت شوية قبل ما تكمّل كلامها) أي حقة يومّا... هاك المرة، ليلة اللي خالتي هناني عملت الملمة و حلّت صينية البقلاوة أنفينيتي: آه، أي أي... ش ثمة كاكتوسا: مش قلت وقتها اللي انتي مشيت للحمام أنفينيتي: (تخمم شوية) أنا... أي أي كاكتوسا: ياخي الحمام متاع حومة السوق، مش يخدم للرجال في الليل انفينيتي: آه... أي أي قميرة: (بنبرة كلها سخرية)وووه يومّا... ياخي دخلت لحمام الرجال أنفينيتي: أنا... لا لا الڤوفرنرو: امالا شنوة الحكاية أنفينيتي: (تغزرلهم في وجوههم، بنظرة شاردة، تقعد ساكتة شوية قبل ما تتكلم) مشيت للحمام اللي وراء المحطة قميرة: آه... يخدم للنساوين هذاكة في الليل أنفينيتي: أي أي أنفينيتي: (توقف من بلاصتها) أنا خليني نمشي نرقد... نحس في روحي تاعبة و ناقصة نوم و تمشي انفينيتي لبيت النوم متاعها... و يقعدوا البقية يتفرجوا في التلفزة ما على بالهم بحتى شي قهوة الحومة، الحداش و نصف متاع الليل... طاولة في مدخل القهوة قاعدين علاها طارق و زيزو و كلاندو و مصعب و بيغ تراب بيغ تراب: (يحكي مع طارق) أيواه... كيفاش امالا دكتور مصعب: أي حقة، مبروك مبروك يا دكتور طارق: (يبقبق في الشيشة) لا دكتور لا حتي شي... تي أهوكة ورقة نتمرمدوا علاها، و في الآخر نحطوها في دوسي بش ندبروا بيها خدمة بيغ تراب: ايه، أما موش ورقة كيف الأوراق متاعنا... و دوسي كيف ما الدوسيهات متاعنا طارق: لا لا يا راجل، غادي العباد تقدر العلم و تعطيه قدرو كلاندو: (يقص على خوه، و بنبرة كلها فدة) بربي كان بش تقعد تحكيلنا ع الأمريكان و كيفاش مدبرينها، خلّيني نقوم، و إلا قوم انتي بدّل الطاولة كلاندو: هاك الليلة عمّك سمسوم طيرهالي و هو يحكيلنا ع العيشة غادي... و هذاكة راجل كبير و في مقام بابا ما انجمش نسكتو، قمت و خليتو يحكي وحدو... مش زادة يكمل خويا يغملي على قلبي طارق: (يعاود يجبد نفس م الشيشة) ها ها ها... أما هايلة الشيشة هذي، والله يعطيه الصحة ويروولف قعدوا الجماعة يحكيو... و ينوقز البورطابل متاع كلاندو كلاندو: (يجبد البورطابل متاعو، يثبت فيه، و بنبرة كلها تعجب تحملو ملامحو زادة) شكون هذا زاده كلاندو: ألـــوو التليفون: ... كلاندو: ألــوو، مانيش نسمع التليفون: ... كلاندو: (يوقف فجاة، يبتسم و تظهر السعادة على ملامحو) أي أي كلاندو: (يحكي مع الجماعة) هيا انستو لحظة هاو جيتكم كلاندو: (يعاود يرجع يحكي في التليفون في نفس الوقت اللي قاعد يخرج فيه م القهوة ماشي للشجرة اللي في وسط الحومة) أي أي، هاني خارج تو... هكة نسمع فيك مليح التليفون: ... كلاندو: شنوة يعطيك الصحة هذي سنية تو... ياخي تحبني نشوفك في الحالة هذيكة و نقعد نتفرّج التليفون: ... كلاندو: تي شنوة تو، يزّيتشي عاد التليفون: ... كلاندو: باهي، و انتي شنوة احوالك تو التليفون: ... كلاندو: كيف انتي لاباس، هذيكة الفايدة... تعبك راحة التليفون: ... كلاندو: (يبتسم فجاة، ثمة يتلفت لدار الشيخ ازواو) أي أنا هو... و تنجم تشوفني في الظلمة هكة التليفون: ... التليفون: أنا تو مش قاعد نشوف في روحي... بش انجم نشوفك التليفون: ... كلاندو: (يبتسم) أي التليفون: ... كلاندو: (يضحك، ما يقول حتى شي) ... التليفون: ... كلاندو: آش من نجي نطل عليك، تحب بوك يطرّدني... ياخي نسيت الحكاية اللي بينو و بين بابا كلاندو: تي هي عمتي ولاّدة ما جات كان ما يعلم ربّي كيفاش، و يدها على قلبها لا يسمع بيها التليفون: ... كلاندو: (يضحك) نجي معاها، حلوة هذي التليفون: ... كلاندو: باهي باهي التليفون: ... كلاندو: أي أي، في بالي بالحكاية التليفون: ... كلاندو: لا لا، شكون بش يسمع، ما ثمة كان أنا و البرباش في بالنا بالحكاية... و البنات ما نعرفش عليكم شكون في بالها و شكون لا التليفون: ... ... ... كلاندو: لا لا، البيغ ما في بالوش، ثمة كان أنا و البرباش أرابيكا حكاتلنا ع الحكاية وقت اللي جات تعيّط لعم براستوس بش يهزك لدار الطبيب التليفون: ... التليفون: و الله يعطيه الصحة، و يرحم والديه كلاندو: ... كلاندو: كرهبتو، لاباس علاها... أما كيف ما قال بوك وقتها، وقت اللي جيت حاجتي بيك يا وجهي، خربشوك القطاطس التليفون: ... كلاندو: باهي، بره أرقد على روحك، ارتاح التليفون: ... كلاندو: أنا، تي انتي اللي يعطيك الصحة ع التليفون التليفون: ... كلاندو: باهي باهي... يزيتشي تو، هيا ليلتك زينة و يرجع كلاندو يشد الثنية للقهوة، في نفس الوقت اللي قاعد يسجّل فيه في النومرو في البورطابل... حاسس روحو بش يطير م الفرحة كلاندو: (يتمتم وحدو) أما شبيها شدت ما سيبت في يعيّش خويا يعيّش خويا... تطلعشي بش تحسبني كيف خوها زاده داخل للقهوة، يتلاقى هو و البرباش في المدخل... كلاندو: أهلا بخويا... شنوة امورك البرباش: (باهت في البشاشة الغير عادية متاع كلاندو) لاباس، يعيشك كلاندو: انتي عطيت نومرويا لسنية البرباش: أي أي كلاندو: يا ولدي زايد معاك، نعرف صاحبي راجل البرباش: (يقعد ساكت، ما نجمش يربط الخيوط ببعضها) ... كلاندو: (يڤحرلو على فرد جنب) و انتي من بكري عندك نومروها سنية؟ البرباش: (بكل بلاهة) أي... علاه كلاندو: أيواه... لا لا، حتى شي كلاندو: (يبدّل في الهدرة) هيا ايجى اقعد معانا، هاو طارق و زيزو لهنا من غدوة، العشرة متاع الصباح... اوليسان البوسطاجي يدقدق ع الباب متاع دار العدول... تخرجلو بسيناج مرت طارق أوليسان: صباح الخير، خالتي ولاّدة هوني... عندها جواب بسيناج: أي، تحب نعيطلها اوليسان: لا لا، ايجى هاك مدهولها انتي الجواب... ماهوش مسوڤر يمدلها الجواب، و يمشي على روحو... بسيناج تشد الجواب في يدها، تدوّر عينيها في وسط الحومة، تبتسم فجأة و تخرج م الدّار، تمشي للحانوت متاع الأنفورماتيك متاع نوسترا تدخل بسيناج للبوبلينات، تلقى صفوان راقد ع البيرو، تدقدق ع الباب بش تعمل شوية حس و يفيق بيها بسيناج: (تحكي بصوت مرتفع) صباح الخير صفوان: (يفيق م النوم، عينيه نصف محلولين) صباح الخير بسيناج: بالله عندكم كونكسيون انترنت هوني صفوان: أي، بالطبيعة بسيناج: انّجم نكونكتي صفوان: أي أي... تفضّل أقعد في أي بوست... الكلهم كونكتي تمشي بسيناج تقعد في اول بوست تلقاه قدّامها، مقابل صفوان بالضبط، و تبدى تخدم على روحها بعد بربع ساعة صفوان: لا لا، ما يخدمش هذاكة بسيناج: سامحني... شنوة اللي ما يخدمش! صفوان: اليوتيب، ما يتحلش عندنا في تونس بسيناج: (بلكنة امريكية) أوه نو... امبوسيبل صفوان: و راسك... احنا في تونس كل شي بوسيبل بسيناج: نو نو... مانيش نحكي ع اليوتيب يا سيّد، في بالي بيه مسنصرينو هو و الدايلي موشيون و الفايس بوك تو تو وين رجع بسيناج: نحكي عليك انتي، ياخي قاعد تعس عليّ شنوة نحل و شنوة ما نحلّش زاده صفوان: قلت بش ما تقعدش تحاول في الفارغ على غير فايد بسيناج: دبّر عليّ زاده آش نحل و آش نعمل صفوان: تي باهي... و انتي شعلت فيّ فتيلة بلا زيت... شوف هاك الهدرة بسيناج: (تمدلو دينار) شد شد... ملا حالة، الهم صفوان: لا، خلي علينا مايسالش، محسوب ما عملت شي بسيناج: لا، بارك الله فيك، المزايا الفارغة خليهم ليك، ينفعوك نهار آخر و تخرج بسيناج م الحانوت، تلقى زيزو و طارق راجلها ناصبين كراسي و قاعدين تحت الشجرة اللي في وسط الحومة بسيناج: (تسلّم على زيزو بالبوس) صباح الخير زيزو... شنوة احوالك، تفرهدتشي م التعب متاع السفر زيزو: أي، الحمدولله لاباس، خير من آمس ببرشا طارق: شنوة الجواب اللي في يدك بسيناج: لا لا، حتى شي، جواب لعمتك ولاده بسيناج: (تسكت شوية، تتبدل النبرة متاعها في الحديث) كنت في البوبلينات هذيكة اللي في الحومة، ملاّ حالة طارق: علاه، ش ثمة زاده؟ بسيناج: الطفل اللي يخدم غادي، يتبولد و حاسب روحو يتضومر طارق: (يتلفت للبوبلينات، يلقى صفوان واقف قدّام الباب) آه، صارة هو صفوان... باهي باهي، أنا نسالو مغرفة من قبل طارق: (يرجع يحكي مع بسيناج) بره على روحك، تو نتفاهم معاه تمشي بسيناج على روحها، و يقعد طارق يغزر لصفوان بنظرة كلها غش طارق: (يتمتم وحدو لكن بصوت مرتفع) حسابو ثقل هذا صفوان، يلزم شكون يفيقو عند روحو زيزو: (يغزر للبوبلينات) أي أي، ظاهر عليه انو بليد و ركيك طارق: (يدوّح في راسو) نعرف، ياخي لين تقوللي
عايلات الحومة
1 - عائلة الأستاذ
2 - عائلة الشيخ
3 - عائلة العدول
4 - عائلة المعلم
5 - عائلة الهارب
6 - عائلة البرّاني
7 - عائلة القهواجي
جـمــاعـة الـحــومـة
هية هية قعدت في مخك قعدت الشيشة المرة الفايتة... هههههههه... و صفوان مسيكن هذا ياسر عليه... قداش من واحد بش يعطيه طريحة... بالمناسبة صفوان (الحقيقي) ياسر ناس ملاح و مانجمش نتصورو في المواقف هذية... هههههه
أه حقة... نسيت بش نقول: ويروولف... جيب ولعة... ههههههه
بالشوية في عقلك... وقتاش يكمل هالمسلسل خلي نرتاحوا مالذل
هههههه
rit biléhi Tarek dhaher fia a5ér 7al9a béch nakél tri7a éli hia :S
هههههه
مسكين ويروولف
انا جاتني في برويطة ....نوورماااال تتعدى ...على الاقل فيها سنية...
اما انت شيشة و ولعة مزمرة عليك ههههه
محلاه صوتك في التلفون يا كلندستينو
p:
@ طارق: شوية واقعية ع الاقل، لازم الكلو خيال... نعرفو مليح صفوان و حتى انا ما نتصوروش في مثل المواقف هذيكة لكن الله غالب القرعة حكمت... ههههه
@ ويروولف: هانت يا خويا، آش مازال بالله
@ صفوان: لا لا، مش بش تقعد تستنى لآخر حلقة
@ كلاندو: بره صحة عليك، هاك دبرتها، قول البرباش ما يحبنيش
@ سنية: امالا نكثّر التليفونات؟؟؟