حومة البلوغسفير... أحد الاحياء الشعبية الكائنة بإحدى المدن التونسية

القصة (هذا على فرض انو بش تكون ثمة قصة من أساسو) هي من وحي الخيال الصرف و لا تمت للواقع او حتى للإفتراضي بصلة... فرصة للتذكير انو المدونين بش يكونوا حاضرين كأسماء مستعارة، و بالطبيعة فإنو اي تشابه بين الأحداث و بين الواقع الإفتراضي فهو من قبيل الصدفة لا غير... يعني ما فيناش من غش، و مش بش يتم التعامل بجدية مع أي تشكي أو اعتراض، فقط لأنو وقت بداية نشر هذه الحلقات بش يكون قد تم كتابة الجزء الأكبر م الأحداث... و ما ثماش حتى استعداد للتغيير او لتبديل الأحداث من اجل زيد او عَمْر كائنا من يكون (نتصور علاقتي باهية مع العباد الكل، و ربي يستر)

المسلسل بش يكون على خمسة عشر حلقة، جميع الأبطال و الشخصيات بش يكونوا م المدونين التونسيين... تم تقسيم المدونين على سبعة عايلات المكونة للحومة، التقسيم تلقاوه في الليستة اللي على جنب... هذا بالطبيعة إلى جانب البعض الآخر م المدونين اللي بش تكون ليهم علاقة بالاحداث، سواء من قريب و إلا من بعيد

ملتقانا بحول الله مع أول أيام رمضان... الحلقات بش يتم نشرها نهار بعد نهار (خلال الايام الفردية) و بش تتم برمجة النشر على الساعة العاشرة صباحا بتوقيت تونس (وقت نتصوروا يساعد العباد الكل بما فيهم خاصة اللي يخدموا في الإدارات العمومية، تلقاهم مازالوا فايقين ما بداش يضرب فيهم النوم)

بالنسبة لأول حلقة، تمت كتابتها منذ مدة، على اساس انو المفتي وقت اللي يطلع في التلفزة، بش يقول رينا الهلال (على حسب اليومية، كيف ما استانسنا)... أي تضارب في الاحداث مع الواقع يكون خارج عن سيطرتنا

إن شاء الله رمضانكم مبروك العباد الكل... و صيامكم (بالنسبة للصايمين بالطبيعة) مقبول