حومة البلوغسفير... أحد الاحياء الشعبية الكائنة بإحدى المدن التونسية ملخص أحداث الأسبوع شهدت الحومة خلال الأسبوع المنقضي مفاهمة بين سمسوم و براستوس انو هذا الأخير بش يكري المحل اللي كان كاريه نوسترا، لولدو صفوان بش يحللو فيه مشروع متاع خدمات إعلامية (موجهة للطفل). وسط الحومة، العشرة متاع الصباح... طارق و برستوس و سمسوم قاعدين قدام القهوة متاع الحومة طارق: امالا تفاهمتو سايي براستوس: اتفاهمنا يا طارق يا وليدي... و ربّي يهديه الطفل و يصلح فيه و ما يمشيش يفسّد الفلوس و يطببهم من هنا يخرّجهم من غادي سمسوم: لا لا، ما تقول هـ الكلام يعيّش خويا... مصلّي ع النبي الطفل بمخو و واعي براستوس: (يدوّح في راسو) بمخو... و واعي... بالضبط مازالوا قاعدين، و يتعدّى أوليسان البوسطاجي... ينتبهلو طارق و يقعد يتبّع فيه بعينيه كيفاش وقف قدام دار الكاتب فررر (السكان الجدد متاع الحومة) و قعد يستنى بعد ما ضرب ع الناقوز لين طلعتلو بنت عايلة خذات من عدو جواب و شكرتو و مشي على روحو... هذا الكل و طارق يتبّع فيه بعينيه لين شرد معاه و ما فاق عند روحو كان و سمسوم يحكي معاه سمسوم: (يعدّي في يدّو قدام وجه طارق) يا طارق... معانا ماهو طارق: (يرجعلو شاهد العقل) آه... أي أي معاكم براستوس: وين سرحت ياخي؟ طارق: (مازال مصهمم) لا لا... حتى شي، حتى شي دار الكاتب فرر، العشرة و نصف متاع الصباح... بنت عايلة قاعدة قدّام الشباك متاع بيتها، تقرى في ورقة، قبل ما تتبسّم و تحضنها بالقوي بنت عايلة: (اتمتم وحدها، بعد ما تذبّل عينيها) ايـــــه، محلاه بشبوش بنت عايلة: و محلى الشعر متاعو تسمع حركة و حس متاع خطوات قريب من بيتها عبرات: هيا يعيش بنتي... ياخي ماكش بش تخرج م البيت، ايجى عاوننا شوية في الكوجينة يهديك تزرب بنت عايلة تطوي الورقة كيف ما جات و تخبّاها تحت مريولها... قبل ما تحس باليد متاع خالتها عبرات اتحطّت فوق كتفها عبرات: (حاطة يديها الزوز على كتف بنت عايلة، و تغزر في الشبّاك) ش ثمة ياخي؟ بنت عايلة: ما ثمة شي، علاه؟ عبرات: نغزرلك من قبولي واقفة قدّام الشباك و سارحة ماكش هوني جملة بنت عايلة: انا؟ عبرات: لا... انا! عبرات: حتى ماما عيطت عليك درى قدّاش من صوت... ما جاوبتهاش بنت عايلة: و الله ما سمعتها عبرات: (بنبرة متاع تبهنيس، مع غزرة على فرد جنب) مثبتة ما ثمة شي؟ بنت عايلة: وووه تاتا... ياخي تعرفني نخبّي عليك حاجة بالله؟ عبرات: (بنبرة كلها ود) امالا هيا عزيزتي، ايجى أقعد معانا في الكوجينة. عبرات: (تسكت شوية) ما تعمل شي... أقعد معانا و اكهو، أعطي كلمة و خوذ كلمة بنت عايلة: (تبتسم) باهي تاتا... هاو جيت. و تمشي عبرات على روحها، و تخرج م البيت... و تعاود بنت عايلة تتلفّت للشباك، و تتنهّد، غصرة و اتعدّات. دار براستوس المعلّم... صفوان و مغرمة و اللص نومرو واحد قاعدين في بيت الصالة... صفوان لابس سروال دجين ازرق، و سورية بيضاء، و محجّم لحيتو. مغرمة: (بنبرة تدل على سعادتها، تغزر لصفوان و تستخايل) مصلّي ع النبي على وليدي... اللص نومرو واحد: و شنوة بش تعمل تو؟ صفوان: ثمة شوية أوراق طلبوهم عليّ، تو نحضّرهم و نهزهم معايا المرّة الجاية. مغرمة: (بنفس النبرة متاعها) هزهم وليدي هزهم، امالا ش تعمل مغرمة: (تعاود تغزر لولدها مرة أخرى، و تستخايل) الحوت، الحوت، عيني ما تضرّك... الوشق و الدّاد في عينين الحسّاد في نفس الوقت، يتحل باب الدّار... يدخل براستوس براستوس: آه، ش عملت فيها صفوان: هاني سايي... بديت نحضّر في الأوراق براستوس: ربّي معاك ولدي... أعرف وين تحط ساقيك! صفوان: تهنّى بابا... ما عندك كان الرجال. يمشي براستوس للكوجينة، تخلط عليه مغرمة تجري براستوس: (يدوّر في عينيه في التراكن متاع الكوجينة الكل) ياخي ما طيبتش اليوم مغرمة: و الله فرحتي بوليدي نساتني... مغرمة: (تسكت شوية) هاني بعثت شادوو تجيبلنا في دجاجة مصلية كاملة، تو نفطروا بيها و و احنا رايضين براستوس: (يتنهّد) و الله خايف ع الولد لايمشّيلي الفلوس، يطببهم من هنا يخرّجهم من غادي... و نقعدوا هكاكة حاطين افامنا في الحيط مغرمة: محسوب... أنا عندي كيف ولدي عاود خرج للدنيا و قابل العباد، بفلوس الدنيا و ما فيها براستوس: (يعاود يتنهّد مرة أخرى) تي العمال على ربّي و برّه قدّام القهوة، بشبوش و تيتوف قاعدين يحكيو مع بعضهم، يعيطوا و بالسيف ماهم يسمعوا في بعضهم بشبوش: بالله ايجى ندخلوا للداخل، برشا حس تيتوف: باهي، ايجى و دخلوا للقهوة، و اتركنوا في تركينة م التراكن، بعيد ع الكيّاس تيتوف: ولات ثمة ياسر حركة في الحومة مصلّي ع النبي... عباد و كراهب بشبوش: أي، و برشا حضب على غير فايدة... ما كثروا كان العرك و المشاكل بشبوش: خسارتها الحومة، ماشية و تتهلك تيتوف: علاه، اساعة باهين المشاكل و العرك... الواحد يلقى باش يبدّل الجو بشبوش: (يبتسم) باهي باهي... هات خلّي نكتبوا الجواب متاعنا تيتوف: مثبّت عجبتها القصيدة الاخرى بشبوش: يا ولدي شنوة عجبتها... لو كان ما عجبتهاش نعاود نقوللك نكتبوا واحدة اخرى تيتوف: بهي هات نبداو تيتوف: (يبدى يكتب ع الورقة) عزيزتي... تيتوف: (يغزر لبشبوش) ش اسمها هي ياخي؟ بشبوش: (يتلّف في الجرّة، مع ابتسامة خفيفة) ش علينا في الأسامي... خلّيها عزيزتي و برّه تيتوف: و الله قلت الحق... ش علينا في الأسامي تيتوف: (يغزر لبشبوش) شوف العفسة هذي... قوية بشبوش: يا ولدي اكتب اكتب... أنا عندي فيك ثقة كاملة تيتوف: (يتكلّم و يعبّر بيدّو قدّام وجهو) و عدت... دونما موعد، دونما سابق إعلام... عثرت عليك صدفة، كما عثرت عليك أول مرة بشبوش: يا خويا، الحوت عليك و برّه... اكتب اكتب و قعد تيتوف يكتب، في نفس الوقت اللي بشبوش يدوّح في راسو و هو يڤحرلو على فرد جنب، مع ابتسامة خفيفة موش مشلّقة حانوت أزواو، الثلاثة متاع العشية... براستوس و ازواو يڤجدروا براستوس: و الله خايف عليه الطفل يا شيخ أزواو: تي علاه، شبيك النهار الكل و انتي ما عندك في فمك كان كلمة و الله خايف عليه الطفل براستوس: يا خويا راهو الطفل، المدة اللي قعدها في الدّار بعد ما حب يحرق لإيطاليا... مسحتلو مخو أزواو: يا و الله احوال... صفوان ولدك هذا براستوس: أي، يا خويا براستوس (يدوّح في راسو و بنبرة كلها حسرة) يا حسرة على صفوان، المشاكلي، البزناس، البليد الركيك أزواو: آه آه آه... و شبيه تو براستوس: تو ما قعدتو كا المشاكل، النهار الكل و هو يتبلّى على اخوتو البنات و برّه. أزواو: ربي يصلح حالو... كيف ما صلحلي حال بشبوش وليدي براستوس: و بشبوش تو ش عامل... مازال يصلّي باقي؟ أزواو: ما يبطّلش فرض... أما عايش دنيتو زادة أزواو: شوف شوف... ولدك صفوان، دواه عندي براستوس: كيفاش أزواو: ريتو هاك الطفل... الجماعة الجدد اللي سكنوا في الحومة... تي سي فرر براستوس: ولدو أرتيكولي! أزواو: متاع الطريحة... لا لا! براستوس: (بكل اشمئزاز) الوشقة الآخر أزواو: أي، هاكا تيتوف... خليه يرمي الولف على ولدك... مديدة و تو تشوفوا كيفاش رجعلك براستوس: لا لا، أخطاني منو الطفل هذاكة، لسانو متبرّي منو اللطف أزواو: تي ش يهمّك فيه... أقضي بيه شورك و من بعد ابعثو براستوس: (بكل جدّية) زعــمة؟ أزواو: تي شنوة زعمة... ياخي مازلت اتخمم فيها أزواو: لحظة... تو نعيّطلو براستوس: تلقاه زعمة؟ ازواو: وين عندو بش يمشي، أهوكة النهار الكلو و هو يدور في الحومة من تركينة لتركينة، وين العرك وين هو و خرج ازواو م الحانوت... قعد ازواو قريب الدرج البرّه م الحانوت قبل ما يعاود يرجع و معاه تيتوف أزواو: تي ايجى يا ولدي! تيتوف: تي اخطاني منو يا شيخ بالله! ازواو: تي شبيك تحكي هكة... قلتلك ادخل... ماهو اسمع الكلام تيتوف: باهي، هاو دخلت... و من بعد؟ أزواو: سلّم على عمّك براستوس و اقعد تيتوف: السلام تيتوف: هاو سلّمت... و من بعد ازواو: (طلعلو العصب) تي أقعد... الهم مبلدك و مركّك قعدوا الثلاثة، يغزروا لوجوه بعضهم، كل واحد يستنى في شكون بش يبدى الحديث أزواو: (يتلفّت لتيتوف) خالتك... اللي أعطات الكف لأرتيكولي خوك. تيتوف: (يهم بش يقوم) تو معيّطلي لهنا بش تسألني ع الحكاية هذي أزواو: تي شبيك... حكاية في مخي، حبيت نعرفها أزواو: شكون تكون من خالاتك؟ تيتوف: علّيسة... علاه زادة أزواو: علّيسة... اممممم أزواو: (يفيق عند روحو) لا لا، اما على خاطر حضرت علاها الحكاية... و حبيت نعرف شكون و برّه. تيتوف: باهي... شنوة الحكاية اللي معيطلي علاها ازواو: تخدم و الا قاعد تيتوف: ندبّر في راسي أزواو: معناها قاعد... و اللي يدبّرلك خدمة تيتوف: شنوة؟ ازواو: انحبوك تشد مع صفوان ولد عمّك براستوس تيتوف: (يدوّح في راسو، في نفس الوقت اللي يڤحر فيه لبراستوس على فرد جنب) عمّي... أي ازواو: الطفل عاقل برشا، و الحانوتة يلزمها واحد ماضي... عاد قلت لعمّك براستوس ما خيرش من هاك الطفل الباهي تيتوف براستوس: (بنبرة كلها تمقعير، تحت حس مس) أي، الطفل الباهي تيتوف: (يجاوبو بنفس اللهجة متاعو) يرحم عمّي ازواو: تي اخطاونا... ش قولك تيتوف: (يوقف) يعمل الله يا شيخ... تو نعمل رايي و نقوللك أزواو: ش من تعمل رايك... ياخي فيها تخمام الحكاية! تيتوف: يعمل الله... يعمل الله و يخرج تيتوف، و يخلّيهم الزوز في الحانوت براستوس: (يڤحر لأزواو على فرد جنب) يا شيخ... ازواو: نعم! براستوس: ياخي شنوة حكاية خالة الطفل هذي زادة ازواو: (بنبرة كلها لا مبالة) لا... حتى شي، تنسنيس و برّه براستوس: أما هـ الطفل براستوس... يعطيه القوة مبلدو و مرككو أزواو: تي ش عليك فيه، أقضي بيه شويرك براستوس: و الله قلت الحق... ياخي انا بش انّاسبو أزواو: (يدوّح في راسو، و يڤحر لبراستوس) أي والله... ياخي انتي بش تناسبو.
عايلات الحومة
1 - عائلة الأستاذ
2 - عائلة الشيخ
3 - عائلة العدول
4 - عائلة المعلم
5 - عائلة الهارب
6 - عائلة البرّاني
7 - عائلة القهواجي
جـمــاعـة الـحــومـة
titeuf w safwene??? on n'est pas sorti de l'auberge:!!!! :)